29.6.11

,,Իրավունքների Տեղեկատվական կենտրոն,,  ՀԿ-ի նախաձեռնությամբ  և Եվրասիա Համագործակցություն Հիմնադրամի ֆինանսավորմամբ 2011թ.–ի մայիսից մեկնարկել  է ,,Մոնիտորինգը և հանրային իրազեկումը որպես իրավունքների պաշտպանման երաշխիք,, ծրագիրը: 

Ծրագիրը նպատակ ունի մարդու իրավունքների պաշտպանությամբ հետաքրքրված երիտասարդների համախմբման և պրակտիկ գործունեության  ակտիվացման միջոցով նպաստել մարդու իրավունքների պաշտպանման, արձագանքման և հանրային իրազեկման համակարգի կայացմանը Սյունիքի մարզում:
Ծրագրի համաձայն` նախանական փուլում քաղաք Գորիսում կկազմակերպվեն     դասընթացներ  մարդու  իրավունքների   ոլորտում  Սյունիքի  մարզից  ընտրված 25  երիտասարդների  համար: Երիտասարդ  մասնակիցները    ստացած գիտելիքներն  ու հմտությունները  կկիրառեն  և   կանցկացնեն  մարդու  իրավունքների  մոնիտորինգ  և  դրա  վերաբերյալ  կպատրաստեն   զեկույց:
Ծրագիրը  եռափուլ  է:  ,,Մարդու  իրավունքների  մոնիտորինգ /Խոսքի  ազատության,  արտահայտման իրավունքի, խաղաղ  հավաքների  իրավունք/,,   խորագիրը  կրող  առաջին  հանդիպում-դասընթացը  հունիսի 18-ից   20-ը  անցկացվել  է  Գորիսում: 
 Չնայած  ծրագրիրը  նախատեսված  էր միայն  Սյունիքի  մարզի  երիտասարդների  համար,  բայց  բազմաթիվ  այլ  մարզերից  ստացված  դիմում-հայտերը  նույնպես  քննարկվեցին,  և թիմի  բազմազանության ու  մայրաքաղաքի  հետ  կապը  պահելու  համար մեկ  մասնակից  էլ  հրավիրվեց  Երևանից:   
 Որպես դասընթացավարներ հրավիրված  էին մարդու  իրավունքների  ասպարեզում  բազմափորձ  մասնագետներ  Էդմոն Մարուքյանն ու Կարեն Թումանյանը: Ինչպես  նշում է  Էդմոն  Մարուքյանը,     շատ  հետաքրքիր  լսարան  էր  հավաքվել  և  դրա  պատաճառներից  մեկն  էլ այն   էր,  որ  մասնակիցները տարբեր   նախասիրություններ  ունեցող,  տարբեր   բնագավառներում մասնագիտացող   խանդավառ  երիտասարդներ  էին: Ամեն ինչ անցավ  ուրախ և աշխույժ մթնոլորտում` նոր գիտելիքներ, նոր ծանոթյուններ և արդեն  իսկ կուռ թիմի առկայություն:  Թրեյնինգի  մասնակից  Նորիկ  Թունյանը  ասում  է,  որ  այս դասընթացի ընթացքում, բավականին չափով տեղեկություններ  է ստացել, թե ինչպիսի իրավունքներ ունի իր խոսքն արտահայտելու, սեփական  կարծիքն  ունենալու և  ուրիշներին տեղեկացնելու բնագավառում: Դասընթացի մասնակիցների միջև ձևավորվել էր մի հաճելի մթնոլորտ, որտեղ նույնիսկ խիստ քննադատությունը ուղղեկցվում էր փոխադարձ հարգանքով:
Դասընթացները  հագեցած  էին  թեժ  քննարկումներով,  կողմ  և  դեմ  կարծիքներով, բազմաբնույթ  օրինակներով,  թեմատիկ խաղերով:  Հանդիպման  առաջին  օրը  խոսվեց մարդու  իրավունքների,  խոսքի  ազատության,  խաղաղ  հավաքներ  կազմակերպելու կոնցեպցիաների  մաին: Մասնակիցները  այնքան  էին  տարվել,  որ  նրանցից   մեկը,  ով  ,, Խաղաղ  հանրահավաք,,  խաղում   որպես  ոստիկան   էր  հանդես  գալիս, իր  համար  թղթե  ոստիկանական  համազգեստ  էր  սարքել և խաղը  ավելի  տպավորիչ  էր  դարձրել:
       Համաձայն օրակարգի`
                         ՀԿ-ի նախաձեռնությամբ   մասնակիցները  առաջին  օրվա  դասընթացի  ավարտից  հետո  այցելեցին  Ակսել  Բակունցի  տուն-թանգարան,  որտեղ  նրանց  ծանոթացրին  մեծ  գրողի  կենսագրությանն  ու  գործունեությանը: 
 Երկրորդ  օրը մասնակիցները ծանոթացան,  թե ինչ  է մոնիտորինգը,  ինչպես  իրականացնել  խոսքի  ազատության,  խաղաղ  հավաքների կազմակերպման  մոնիտորինգ և   հետաքրքրությամբ  տեսական  մասը  յուրացնելուց  հետո,  անմիջապես   անցան  դրա  կիրառմանը  և   բաժանվելով  թիմերի`  Գորիսի  մարդաշատ  վայրերում  անցկացրին փոքրիկ  հարցումներ` մարդու  իրավունքների   պաշտպանման  տարբեր  թեմաներով: Անցկացման  կարգն  ու  թեման  նախապես  քննարկվել  և  մշակվել  էր  դասընթացավարների  հետ:  Արդյունքները  նույնպես  ամփոփվեցին  նրանց  հետ:  Օրվա  վերջում մասնակիցներին  հանձնարարվեց    տնային  աշխատանքներ:
Այդքան  կարճ   ժամանակում արդեն  իսկ միմյանց  հարազատ   դարձած  մասնակիցները  հրաժեշտ  տվեցին  միմյանց  ու դասընթացավարներին`  անհամբեր  սպասելով  հաջորդ  հանդիպմանը:  Այժմ    էլ  նրանք հեռավորության  վրա  միմյանց  հետ շփվում, դասընթացից մնացած   տպավորություններով կիսվում,  քննարկումներ  են  կատարում սոցիալական ցանցերում: