Վճռաբեկ դատարանում կաշառքի սակագինը 10.000-50.000 ԱՄՆ դոլար է

Հայաստանի Հանրապետության Մարդու Իրավունքների Պաշտպանի գրասենյակը արտահերթ զեկույց է հրապարակել արդար դատաքննության իրավունքի վերաբերյալ, որը կարծում ենք աննախադեպ է ոլորտում առկա կոռուպցիոն իրավիճակի հրապարակման առումով:

Զեկույցի նախաբանում նշված է, մեջբերում. «Եթե Վճռաբեկ դատարանը լիներ վստահելի, ապա Վարդան Պետրոսյանի վթարի, Ավետիք Բուդաղյանի սպանության, Հարսնաքարում Վահե Ավետյանի սպանության դեպքերում ամեն քաղաքացի չէր փորձի դառնալ դատավոր, փոխարենը կսպասեր Հայաստանի դատարանի արդար վճռին ,,:

Զեկույցում անդարադարձ է կատարվել անգամ դատական համակարգում գործող կաշառքի սակագներին, մեջբերում զեկույցից.
Դատական կաշառքի սակագներ.

Կաշառքի չափը որոշվում է հայցագնի 10 տոկոսից ելնելով:
Ընդհանուր առմամբ հարցվածների մեծ մասի պնդմամբ կաշառքի
սակագները տատնվում են հետևյալ միջակայքերում.

• առաջին ատյանում 500-10.000 ԱՄՆ դոլար,
• վերաքննիչ դատարանում 2.000-15.000 ԱՄՆ դոլար,
• Վճռաբեկ դատարանում 10.000-50.000 ԱՄՆ դոլար:

Զեկույցում մեջբերված է նաև օմբուդսմենին ուղարկված մի դատավորի գաղտնի հաղորդումը.
Օմբուդսմենին՝ դատավորի գաղտնի տեղեկացումից.
«Վճռաբեկ դատարանի դատավորի կողմից ինձ տրվեց կրիչի վրա ձայնագրված տվյալ գործով կայացվելիք դատական ակտի տեքտը և հրահանգվեց այն ներկայացնել որպես իմ սեփական որոշում»:

 Իրավական պետությունում, այսպիսի զեկույցը ռումբի նման պետք է ,,պայթեր ,, իր հետաքննական շարունակությամբ, բայց Հայաստանում արդեն կարծես սովորական է դարձել, երբ ,,բարերարի,, ,,հայրենասերի,, , ,,պետական մեծ գործչի,, դիմակներով հասարակության մեջ վխտում են իրական հանցագործներ:

Զեկույցն ամբողջությամբ կարող եք կարդալ ombuds.am կայքում